Am 4. Mai 2009 sind mer nachere schloflose Nacht am Morge um die 8 a.m. in Kanada glandet. Zerscht mal es dicks Zmorge und denoch zur Fraserway-Vermietstation euse Camper goh fasse. Es super Fahrzüg und en riese Hotdog händ mer entgegenoh und sind im Verlauf vom Nachmittag uf North Vancouver, wo mer eus nachem grosse Ichauf ufeme Caravanpark iquartiert händ. Am nächste Tag händ mer zerscht mal richtig lang uspfused, was mer würklich nötig gha händ und sind im Verlauf vom Nachmittag ufd Fähri Richtung Vancouver Island. Uf Vancouver Island händ mer e Wuche verbrocht. S'Wätter isch chli wechselhaft gsi, ziemlich chalt und rägnerisch, doch zwüschedure hät au es bizeli möge d'Sonne duredrucke. Die Wuche händ mer mit Whalewatching (Orcas), schöne Rägewaldspatziergäng (mit über 800 Johr alte Douglasie), durch d'Städt schlendere (Victoria isch ganz e schöni Stadt), Provinzpärk gnüsse (fische, brötle) sowie pöschtele und Insle erkunde verbrocht. Am Mäntig, 11. Mai 2009, sind mer dänn weder ufd Fähri und zrugg nach Vancouver. Mer händ eus nomal in North Vancouver für 2 Täg iquartiert. Mitte Woche sind mer dänn ufbroche, B.C. zerkundige, zerscht Richtung Harrison Hot Springs bis zum Hicks Lake (Sasquatch). En Tag sind mer zum Fraser Canyon "Hells Gate". Da endlich d'Sonne füre cho isch, händ mer das gnutzt und sind statt mit em Gondeli, z'Fuess i die Schlucht abegloffe. Am Flussufer hät es Restaurant, Souvenierläde, es chlises Lachsmuseum, e luftigi Hängebrugg sowie en Art nochebouti Stadt gha, wo mer witzigi Föteli hät chöne mache. Am gliche Tag sind mer no wiiter bis nach Cache Creek. Am nächste Morge (Friitig, 15. Mai 2009) sind mer uf nach Kamloops ond danach durch wunderschöni Wälder gfahre. Mer händ rächt lang nachere Übernachtung gsuecht, weil am Montag druf isch Victoria Day gsi und alli, würklich alli Kanadier händ ehres Wohnmobil füre gnoh und sind goh Campe. Es isch rächt en Krampf gsi für die folgende Täg Übernachtigsplätz in Provinzpärk zfinde, aber irgendwo häts dänn doch no immer eis einzigs für eus frei gha und witzigi Bekanntschafte händ mer so au no gmacht. Die folgende Täg händ eus wiiter über Salmon Arms nach Revelstoke, Golden, durch de Yoho Nationalpark nach Lake Louise, drab über Radium Hot Springs bis Invermere nach Cranbrook gführt, wo mer weder en huufe erläbt händ. Zum Bispiel händ mer kurz nach Golden euse erscht Schwarzbär gseh! Es riese Erlebnis. Drufabe händ mer e Begegnige mit Big Horn Sheeps und eme Elk gha sowie en huufe Streife- und Eichhörnli sowie endlos vell Erdmändli. Mer händ eus in Provinzpärk iquartiert, wo mer händ chöne fische, brötle und chlini Wanderige mache, Wasserfäll bsueche und die endlosvelle wunderschöne Lakes vo Kanada gnüsse. Zwüscheddure sind mer weder ine Stadt ond händ eus ime Starbucks oder Tim Hortons etc. verpflegt und suscht goh ichaufe sowie ond weder zrugg id Wildniss (Provinzpärk). Am Morge vom 24. Mai 2009 (die Ziit lauft au wie verruckt) sind mer dänn ufbroche nach Alberta! Über dä Crowsnest Pass, e 400 km Tagestour, "dä Cowboy Trail", bis zum Bow Valley. Ganz en anderi Landschaft, wo eus uf dere Tour erwartet hät: En huufe Ranches, Ölpumpene, Cowboydörflis, wiiti Fruchtfälder ond i dä Wiiti dä herrlich Anblick vo de Rocky Mountains. Nach em Bow Valley sind mer is Kananaskis Country zum Peter Lougheed Provincal Park. Die folgende Täg händ mer echt so vell erlebt, mer händ paar Moose (Elch) gseh, Grizzlibäre sogar eini mit Jungem, Deers, 2 Coyote ond enlos vell Nagertier und Vögel, echt unglaublich, die Tierwält! Das sind scho tolli Erlebnis, wenn mer so vell darf beobachte. Mer händ eus "Bäreglöggli" kauft und sind am 2te Tag uf e Wanderig. Voll optimistisch händ mer welle innert 3 Stund e 17 km Wanderig um dä Upper Kananaskis Lake mache. Die erschte 4 km sind super gsi, schön sonnig und alles perfekt flach. Die folgende 3 km sind dänn scho rächt steil gsi und die letschte 10 km knietiefe Schnee. Es isch würklich happig gsi, doch mer hätted au nie mit ere 10 km lange Schneestrecki inkl. Schneesturm grächnet! Eusi Füess sind richtig blau ond ufgweicht gsi ond us dä 3 Std. sind 5 1/2 Std. worde. Mer sind froh gsi, wo mer dä See umrundet gha, eus ufgwärmt und öppis heisses in Mage becho händ. Am nächste Tag zrugg in Canmore sind mer als Belohnung richtig dick goh Znachtässe ond d'Stadt unsicher mache (sowie erhole!), bevor mer weder wiiter zu dä nächste Abentüür sind.
Eusi nächsti Route hät in Banff sowie Japser Nationalpark gfüehrt. Nach Banff sind mer nach Lake Louise. Wiiter entlang de Rocky Mountains händ mer diversi Stops gmacht, bem Herbert Lake, Mistaya Canyon sowie dä Icefields. En Tag später sind mer vom Gletscher us wiiter Richtung Jasper. Unterwegs händ mer no d'Athabasca Falls besichtiget. Vo Jasper sind mer nach Pocahontas zu dä Miette Hot Springs kurz goh bädele. Am Obe händ mer die Region verloh und sind in Mt. Robson Provinzpark. I dene beide Täg Banff / Jasper Nationalpark händ mer ja weder so unglaublich vell Tier gseh: Bäre, Elch mit Jungem, 2 Mountain Goat (da sind die wisse Wollegeisse) und no vell meh... es get echt emmer so vell zgseh.
Zrugg in B.C. isch scho de 30. Mai 2009 und mer sind bem höchste Berg vo de Rocky Mountains, bem Mt. Robson (3954 m) aglangt. Eusi wiiteri Reis hät eus zum Wells Gray Provincial Park gfüehrt, wos wimmlet vo Bäre ond Büffel! Nach Clearwater sind mer is Okanagan Valley, wo d'Weinroute ond velli Provinzpärk uf eus gwartet händ.
Die folgend Wuche (scho Juni!) händ mer in der Tat in huufe Provinzpärk verbrocht, mit vell Ziit uf dä diverse Lakes mit eusem neue Gummiboot und vell Fisch fange. Mer händ en huufe Lüüt kenne glernt, wo mer später zum Teil au weder troffe händ. Ab id Rebe sind mer natürlich au und im Weinguet vom Gray Monk sehr guete Wein degustiert und kauft. Wiiters zum Degustiere sind mer au id Icecream-Factory Tickleberry, wos natürlich au no e riese Portion Glace (aus rund 50 verschiedene Sorte) gäh hät. Eines Tages häts eus no anes Nascar-Autorenne verschlage, was au mal es tolls Erlebnis gsi isch.
Vom Okanagan Valley wiiters händ mer eusi Route nach Merritt - Lilooet - Whistler (wo die Olympiadische Winterspiel 2010 sind) - weder zrugg nach Vancover igschlage.
Nachdem mer am 16. Juni 2009 euse Camper abgäh händ, sind mer uf Vancouver City, um zum Abschluss vo Westkanada no d'Stadt zbesichtige. Mer händ wunderschöni Täg dörfe erläbe ond sind am 18. Juni 2009 in Oste vo Kanada (Toronto) wiitergfloge.
Zrugg in B.C. isch scho de 30. Mai 2009 und mer sind bem höchste Berg vo de Rocky Mountains, bem Mt. Robson (3954 m) aglangt. Eusi wiiteri Reis hät eus zum Wells Gray Provincial Park gfüehrt, wos wimmlet vo Bäre ond Büffel! Nach Clearwater sind mer is Okanagan Valley, wo d'Weinroute ond velli Provinzpärk uf eus gwartet händ.
Die folgend Wuche (scho Juni!) händ mer in der Tat in huufe Provinzpärk verbrocht, mit vell Ziit uf dä diverse Lakes mit eusem neue Gummiboot und vell Fisch fange. Mer händ en huufe Lüüt kenne glernt, wo mer später zum Teil au weder troffe händ. Ab id Rebe sind mer natürlich au und im Weinguet vom Gray Monk sehr guete Wein degustiert und kauft. Wiiters zum Degustiere sind mer au id Icecream-Factory Tickleberry, wos natürlich au no e riese Portion Glace (aus rund 50 verschiedene Sorte) gäh hät. Eines Tages häts eus no anes Nascar-Autorenne verschlage, was au mal es tolls Erlebnis gsi isch.
Vom Okanagan Valley wiiters händ mer eusi Route nach Merritt - Lilooet - Whistler (wo die Olympiadische Winterspiel 2010 sind) - weder zrugg nach Vancover igschlage.
Nachdem mer am 16. Juni 2009 euse Camper abgäh händ, sind mer uf Vancouver City, um zum Abschluss vo Westkanada no d'Stadt zbesichtige. Mer händ wunderschöni Täg dörfe erläbe ond sind am 18. Juni 2009 in Oste vo Kanada (Toronto) wiitergfloge.
