Australien 2

Nach de Taeg be de Australier sind mer wiitergreislet Richtung Norde. Mer choend grad i eim verzelle, wie mer die letschte 2 Wuche verbrocht haend: Jede Tag en neue Beach, jede Tag vell Kilometer Einsamkeit (am Beach, yeah, alles euse), BBQ`s, Sonne, Sonne, Sonne, Fische (mit riesig vell Erfolg und feinem Znacht, njammmi) und wunderschoene Plaetz. Mer haend es richtig guets Gspuehr becho, wo die sind und entdecket jede Tag vell Neus und loehnds eus eifach guet goh (so wies muess sii!!!). Zur Ziit sind mer na in NSW, bevors a die grossi Goldkueste goht... pressant haends mers jo nid... also, wiitergohts, mit gemuetliche Taeg mit Nichtstun und gniesse... :-)

Australien

G`day

Nach 9.10 h fluegen sind mer in Melbourne acho. S`Gepaeck haet chli uf sich warte loh, mer haend scho fascht gmeint, das hebets in Thailand vergesse. Zum Glueck isch es nach langer Ziit no cho und mer haend ziemlich schnell en Bus id City zu eusem Backpacker verwuetscht. Voreweg zum saege, en super Backpacker. Mer haend eus grad igwoennt und dMuedigkeit wo mer haetted soelle ha, isch verschwunde gsi. E Duschi und daenn id Stadt. Zerscht es Bier, denn es grosses Glace, Sunne und es super Quartier fuer en tolle Istieg. Gege Obe isch eus grad naebedzue es genials Openair mit Markt, Musik and Food botte worde, perfekt!

Mit eme Schlummertrunk und nochli Internet haend mer de Tag beendet. Am naechste Morge sind mer denn ganz gspannt los zum euse Camper goh abhole. Juhuuu... ! S`heatt sini Ziit brucht, bes denn alli Formalitaete graeglet gsi sind, doch wo mer denn Mitte Nachmittag i eusem Hightopcampervan losgfahre sind, isch s`Gfuehl eifach riesig gsi. Yes, we got it!

Los... first destination: Great Ocean Road. Nach paar Stuendli fahre haend mer eus es gemuetlichs Plaetzli gsuecht zum pfuuse, es BBQ eroeffnet und de Obe usklinge loh. Am naechste Tag haend mers denn gwagt, eini vo de schoenschte Routene vo de Welt zerkunde... (see the pics).

A dem Tag isch es wahnsinnig heiss gsi...

... Ends Great Ocean Road isch ziemlich scho Obe gsi, mer haend eus es Plaetzli zom Pfuse gsuecht, spot no Znacht koecherlet und Australier kenneglernt. Die erste, vo allne folgende, wo eus gwarnt haend vo de Bushfires.

Ja, alli idae Schwiiz haned die au mitbecho, aktuell do zsii, macht eim denn no truuriger. Die folgende Taeg haend mer eus denn immer recht muesse informiere, bzw. d`Luet do sind grad automatisch uf eim zuecho und haend verzellt, wo mer no choend dure fahre. D`Fuer haend mer vo wiitem gseh und de Rauch gschmoeckt, vell Weg zum waehle haend mer nid gha. S`isch unheimlich gsi. Mer haend eusi Route im Suede (Vicotria) muesse abbreche und sind weder zrugg zerscht Richtung Melbourne, uf d`Phillip Island. Phillip Island isch laessig gsi, haet eus super gfalle, d`Toeffstrecki zgseh und vieles meh. Am 10. Februar sind mer denn a de Kueste entlag Richtung Sydney (NSW). Sydney erwartet eus am Sonntig, aktuell sind mer nun i de Blue Mountains, wos komischerwiis sehr chalt isch und avo raegne haet.

Ca. 3 Taeg sind mer i de Blue Mountains gsi. Mer haend leider nid choene goh Wandere, wies mer vorgha haend (to much rain) und haend stattdesse s`fuultierle gnosse. Am Sonntig sind mer denn uf Sydney wiiter und mer haend echt en tolle Nachmittag gha, vell glacht und gseh (Darling Harbour etc.) und riesig vell ikauft (am Peddys Market), yeah. Mer haend sogar no en Schwiizer kenneglernt. Am naechste Tag haend mer denn no de Weg id Bondi Junction, an Bondi Beach, Bronti Beach und weder is Center uf eus gnoh. Mer haend no de City Tower gseh, s`Operehuus, d`Harbour Bridge, de Royal Botanic Garden and much more bestuunt. Am Obe sind mer denn wiitergfahre nach Morisset zu richtige Australier und do wiilet mer nun siit 3 Taeg mit en huufe BBQ`s ond allem drum und dra - die Gastfruendschaft isch eifach riesig.

Goodbye and Thailand

2 uf Reise...

...und als Abschied de bescht Dessert, njammmiii!

Am 25. Januar 2009, 13.30 Uhr, haets am Flughafe Zuerich gheisse, los, Richtung Bangkok! Fuer 5 1/2 Moenet haned mer Abschied gnoh, vo eusne Liebschte und de Schwiiz. Mer haend es richtig schoens Abschiedskomitee gha am Flughafe, u lieb.

Nach 10.30 Stund sind mer daenn in Bangkok acho. Gschlofe haend mer us luuter Nervositaet nid wuerklich. Am 6i am Morge haet eus d`Sunne und Waermi entgegeglacht. S`Gepaeck hand mer sehr schnell gha, doch euse Chauffeur haet raecht lang uf sich warte loh. Nach ca. wiitere 1 1/2 Stund sind mer daenn mit eusem Privattransfer nach Koh Chang unterwegs gsi. Anfangs Nachmittag sind mer daenn im Paradies acho: White Sand Beach Koh Chang.

Mer haend wuerklich es Bijou vo Hotel verwuetscht und es haet so ziemlich alles gstumme. Sun, fun and nothing to do and the Matz uf de Luftmatratz [Matthi-Spruch (!)], grins.

Jede Tag es Bierli trunke, Massage, kullinarisch alles usprobiert wo eim agluegt haet, de Sandstrand direkt vor em Zimmer, Shoppingstreet...
eifach s`Paradies.






Es isch sehr heiss gsi, de Schlof vo dem her nid sehr riesig, doch mer haend jo jeweils de ganz Tag zum nuet due zur Verfuegung gha. Nach 4 Naecht haend mer denn fuer wiiteri 4 Naecht ines luxerioesers Hotel gwechselt, weil mer no en andere Teil vo de Insle haend welle gseh. Leider isch das chli sehr abglege gsi und vowege luxerioeser, haet eus s`erschte vell besser gfalle gha, nur tuerer isch es gsi. Jedefalls sind mer daenn am Lonely Beach glandet. Vowaege, dass es doet sehr ruhig isch, haend mer nuet gmerkt. Mit em Backpacker neabedzue, haets jeweils au bis es hell worde isch Party gaeh. Do waeret mer weder be de schloflose Naecht. Doch de Strand und s`Meer isch eifach weder super gsi. Mer haend die Taeg defuer chli fuer Usflueg gnuetzt . Mer haend en Luxusbootsusflug buechet ond sind vo Bang Bao zu de wunderschoene Straend vo Koh Maak, Koh Rayang Nok, Koh Rung und Koh Kra gfahre. S`schnorchle isch super gsi. Wunderschoeni Koralle, farbigi Fisch ond 2 uf em wiite Meer :-) (insider). Mer sind riichlich verpflegt worde uf dem Boot und haend de Tag in volle Zueg gnosse.

Am naechste Tag haend mer mal probiert nach Hause zSkype, isch toll gsi, die Liebschte zgseh. Am restliche Obe isch eus no e tolli Fuershow praesentiert worde.

En wiitere Tag spaeter, sind denn 2 mit em Roller uf Toure. Mer haend d`Insle selber bekundet. Gfolgt vore riese Shoppingtour zrugg zum Picknicke, haend mer denn de Obe bis zum Znacht no am Strand verbrocht, no die letschte Taeg mit de Luftmatratze gnosse.

Ja, genau, de letschti Tag isch wuerklich au nur no zum plaegere do gsi, bevors am 3. Februar 2009 wiitergange isch nach Bangkok. Euse Privatchauffeur haet eus am 12fi abgholt und eus id big city gfahre. D`Fahrt isch lang gsi und de Verkehr wahnsinnig gross. 7 Mio. Personestadt, das haet sini Ziit brucht, bis mer im Hotel gsi sind. Mer sind gege Obe acho und sind erscht mal goh Znacht aesse. Daenn haend mer eus is Bangkoker Stadtlaebe gwagt. Mit de Undergroundtrain sind mer zum Nightbazzar gfahre. Mer haend no vell zbstuune gha und de Obe gnosse. Am naechste Tag sind mer mit eusem Chauffeur goh d`Stadt besichtige. Viel Tempel und Buddhas haemmer gseh. Aber irgendwenn sind mer richtig dure gsi. Mer sind chli fruehner an Flughafe und sind um 00.15 Uhr (5. Februar 2009) wiiter nach Melbourne, Australia!