Tierwelt Kanada

Hawaii

Am 25. April 2009, um die 11.00 Uhr sind mer in Auckland wiitergfloge nach Honolulu, Oahu. Acho sind mer dänn am 24. April 2009, 21.45 Uhr... was so e Datumsgrenze cha usmache ;-)! Zur Begrüssung händ mer en hawaiianische Lei becho und euse Shuttle-Transfer hät eus zu eusem Hotel in Waikiki brocht. Mer händ no schnell - wie sichs ghört - uf Hawaii agstosse und sind dänn goh pfuse. Am nächste Tag, weder voll ready, sind mer dänn goh Waikiki unsicher mache. Mer sind fliessig uf Shoppingtour und eus kullinarisch goh verwöhne loh. Natürlich händ mer au nochli de Strand und vor allem d'Sonne (nach em chalte, aber ebefalls super naturwunder Neuseeland) gnosse. Am Obe isch grad no es Openair gstiege, was mer natürlich super gfunde händ. Am nächste Tag sind mer zwar chli sehr müed gsi, doch trotzdem sind mer voller tatedrang wiiter und zwar an Flughafe und mit em Flüger nach Hilo, Big Island. Euses Mietauto gschnappet, händ mer sogar no en Teil vor Insle, rund um Hilo besichtiget. Am nächste Tag isch es dänn zum Vulcanonationalpark... sehr idrücklich gsi, das Lavagstein... mer sind bis am Obe richtig k.o. gsi. Am folgende Tag, Ziischtig, sind mer zerscht richtig dick goh Zmorge ässe: Bananepancakes mit Ahorn- und Kokosnusssirup ond Macadamianüss... njammiiii... uiii, sind mer voll gsi... ! Euse Weg hät dänn vo Hilo nach Kona gführt. Unterwegs sind mer d'St. Benedict's Church goh aluege und suscht sehr schöni Natur betrachte. S'isch scho recht spot gsi, bes mer dänn in Kona gsi sind, defür sind mer echt "lässig" goh Znacht ässe: Is Bubba Shrimps Lokal, es hät echt a nix gfählt! Es tolls Erlebnis, das isch Plausch gsi. Kona isch echt vell belebter als Hilo, das händ mer denn au am nächste Tag gmerkt, wo mer no id Stadt sind, bevors um de Mittag gheisse hät an Flughafe und zerscht mit em Flüger nach Honolulu (Oahu) um döt de nächst Flüger nach Kauai znäh! Um die 7ni am Obe sind mer uf de Bluemeinsle acho: Kauai. Da de Flüger Verspätung gha hät, euses Mietauto somit eme andere vergäh wurde isch, händ mer dänn s'Glück gha, dass mer zure niegelnagelneue Chryslerlimousine cho sind, woooow! Mer sind is Hotel, was ebefalls au no grad super gsi isch... wo mer für 3 Täg blebe sind. Nun händ mer es perfekts Hotel (inkl. Jacuzzi) und es perfekts Auto gha, nun händ mer eus müesse entscheide, vell Usfährtlis oder weder mal chli Hotelläbe gnüsse... en gsunde Mix häts dänn usgmacht... Zerscht händ mer eus d'Ostküste vorgnoh, über dä Kilauea Point bis an nördlichst befahrbare Ort (Kee Beach). Tag 2 uf Kauai sind mer dänn zum Waimea Canyon... de Anblick cha mer fascht nid in Wort fasse und mit Föteli wiedergäh, so wunderschön... echt de Grand Canyon vo Hawaii! Am letschte Tag händ mer weder Auto no Hotelzimmer welle abgäh... aber ebe... mer händ Ziit vor em Flug no für es schöns Usfährtli zum Spouting Horn gnützt. Am Obe sind mer weder in Honolulu i eusem Waikiki Castle Ocean Resort gsi ond sind richtig dick goh Znachtässe. Am 3. Mai 2009 händ mer dänn de Tag nomal so richtig in Waikiki chöne gnüsse, mit an Strand goh und i de unzählige Läde goh pöschtele, was immer weder schön isch. Am Obe sind mer an Flughafe ond wiiters nach Kanada! Zämmefassend: Hawaii isch total zum gnüsse gsi, mer händ eus kullinarisch extrem verwöhne loh und de Starbucks-Caramel-Machhiato hät au a keim Tag gfählt. D'Natur isch ebefalls extrem vielfältig und interessant gsi, eifach wunderschön. Es total guets Erlebnis!