Neuseeland

Vom 3. April 2009 bis am 25. April 2009 sind mer in Neuseeland gsi. Am 6. April 2009 isch denn no dNicole dezuegstosse (schön gsi, Bsuech us de Schwiiz zha) und mer händ landschaftlich drüü wunderschöni Wuche zu Dritt dörfe verbringe. Es isch zwar oftmals sehr kalt, doch die Natur isch eifach atemberaubend gsi. In Christchurch sind mer gstartet. Mer händ eus nix welle entgoh loh. Güebt mit vellne Kilometer sind mer ja gsi (über 7500 km in Australie innert 2 Monät...), welcome Neuseeland: Vom Lake Pukaki nach Mt. Cook (mit 3754 m dä höchsti Berg vo Neuseeland) zu Milford Sound (bekannt vo Herr der Ringe) zum Fox Glacier sowie Franz Josef Glacier und natürlich zu de Pancakes. Das isch mal grob verzellt dSüüdinsle gsi. Uf de Nordinsle händ mer aber au alles welle gseh ha, aber ebe, sLand isch eifach zgross gsi und dZiit zchurz, zum alles gseh: Nach Taupo-Rotorua zu de heisse Quelle nach Waitomo Caves (goh e tolli Black Water Rafting Tour mache, d.h. uf Lastwagepneu durch e Glüehwürmlihöhli), in Coromandel Nationalpark (HotwaterBeach), Bay of Island, nach Kirikiri goh Bekannti bsueche, danach is Sheepworld (Schöfli schäre und zähle sowie Chötscheli tränke) ond Auckland (inkl. Maorishow) sowie velles meh. Neuseeland isch so wiitläufig und mer händ i dere kurze Ziit so vell gseh wie erlebt (4000 km gfahre), dass mer gar nid alls chan verzelle und mit Föteli zeige... es isch eifach en Erinnerig, wo es Gschänk isch, dass mer die han dörfe erlebe. DNicole isch am 24. April 2009 weder heigfloge id Schwiiz und mer zwei sind am 25. April 2009 wiiter nach Hawaii. Am 25. am 11.00 Uhr abgfloge und am 24. April 2009 um 21.45 Uhr in Honolulu glandet, das isch echt witzig gsi, über dDatumsgränze zrugg zflüüge.